گزشتہ روز موسسہ باقرا لعلوم قم المقدس میں بین الاقوامی ادارہ الباقر کے ذیلی شعبہ الباقر مرکز مطالعات وتحقیقات اسلام آباد کے گروہ تحقیق کا ایک اہم اجلاس منعقد ہوا جس میں مرکز مطالعات کے سرپرست حجۃ الاسلام والمسلمین ڈاکٹر سید شفقت حسین شیرازی، مرکز مطالعات کے مدیر سید ابن حسن بخاری اور مرکز کے محققین حجۃ الاسلام والمسلمین ڈاکٹر فدا علی حلیمی، حجۃ الاسلام والمسلمین عادل علی مہدوی، حجۃ الاسلام والمسلمین نذرعباس حافی، حجۃ الاسلام والمسلمین ڈاکٹر شیخ محسن عباس مقپون نے شرکت کی۔ شرکائے اجلاس نے مرکز مطالعات کی مطالعاتی اور تحقیقی فعالیت کو سراہا۔
الباقر مرکز مطالعات و تحقیقات کے مدیر جناب سید ابن حسن بخاری نے مرکز مطالعات کی ایک سالہ کارکردگی پیش کرتے ہوئے بتایا کہ مرکز مطالعات اپنی مطالعاتی ڈومین میں گزشتہ ایک سال کے اندر مختلف موضوعات پر پانچ جلد کتاب، چند ایک مقالات اور کتابچہ جات شائع کر چکا ہے۔ علاوہ ازیں چند ایک اہمیت کے حامل موضوعات پر مذاکرہ جات اور ویبنارز کا بھی انعقاد کر چکا ہے۔
شرکائے اجلاس نے مرکز مطالعات کی ایک سالہ کارکردگی کو قابل اطمینان قرار دیا اور مستقبل کے مطالعاتی پروجیکٹس کی منصوبہ بندی کی۔یاد رہے الباقر مرکز مطالعات و تحقیقات اسلام آباد بین الاقوامی ادارہ الباقر کا مطالعاتی شعبہ ہے جو ایک سال قبل اسلام آباد میں قائم کیا گیا جس کا بنیادی ہدف اور مقصد تعلیمات قرآن و اہل بیتؑ کی تحریر، تالیف و تصنیف کے ذریعے اشاعت ہے۔
