گزشتہ روز آئمہ مساجد اور دینی طلبہ کے ایک وفد نے الباقر مرکز مطالعات اسلام آباد کا دورہ کیا۔ حجۃ الاسلام والمسلمین ممتاز حسین کی سربراہی میں آنے والے مبلغین و آئمہ مساجد کے وفد کو الباقر مرکز مطالعات کے مدیر /ڈائریکٹر سید ابن حسن بخاری نے خوش آمدید کہا اور مرکز مطالعات کی تاسیس کے مقاصد اور فعالیت سے آگاہ کیا۔ باقر العلوم قم المقدس کے مدیر حجۃ الاسلام والمسلمین فدا علی حلیمی نے معزز مہمانوں کے ساتھ مسجد کے موثر اور مفید انتظام و انصرام (مدیریت مسجد) کے عنوان سے گفتگو کی۔ ادارہ الباقرؑ کے شعبہ تبلیغات مجلس علماء امامیہ کے مدیر حجۃ الاسلام مولانا ضیغم عباس نے مہمانوں کو ادارہ الباقرؑ کے شعبہ تبلیغات کے اغراض و مقاصد اور فعالیت سے متعلق آگاہ کیا۔ اس موقع پر وفد کے سربراہ حجۃ الاسلام والمسلمین ممتاز حسین نے ادارہ الباقرؑ کے مختلف شعبوں کی فعالیت کو سراہا اور ادارہ الباقرؑ کے ذمہ داران کا شکریہ ادا کیا۔ انہوں نے بتایا کہ جامعۃ المصطفیٰ العالمیہ اور جامعۃ الرضا اسلام آباد کے زیر اہتمام مختلف اضلاع سے آئے ہوئے مبلغین اور آئمہ مساجد کے لیے مدیریت مسجد کے عنوان سے ایک تربیتی کورس منعقد ہورہا ہے اور یہ وفد اسی کورس کے شرکاء پر مشتمل ہے۔
مہمانوں کو الباقر مرکز مطالعات کی کتب بھی بطور تحفہ پیش کی گئیں۔
